დავასრულოთ პოლიტიკური კინკლაობა, ახლა ერთიანი, სწრაფი, აქტიური ქმედებების დროა! – პაატა მანჯგალაძე

37

“ახალი საქართველოს“ გენერალური მდივანი პაატა მანჯგალაძე ე.წ. კეთილის მსურველების მოსაზრებას – ოპოზიცია სუსტია და არაფერი შეუძლია, გაუთავებელ ყიჟინად აღიქვამს და მიიჩნევს, რომ ასეთი ქმედება მმართველი პარტიის საარჩევნო სტრატეგიის ხაზის გაძლიერებას უწყობს ხელს.

პაატა მანჯგალაძე ოპოზიციის ლიდერებს სწრაფი და აქტიური ნაბიჯებისკენ მოუწოდებს და მიიჩნევს, რომ პოლიტიკური კინკლაობა უნდა დასრულდეს:

„ეგრედ წოდებული კეთილის მსურველების მიერ გაუთავებელი ყიჟინა, რომ ოპოზიცია სუსტია და არაფერი შეუძლია არის ხელისუფლების მთავარი საარჩევნო სტრატეგიის ხაზის გაძლიერება და ემსახურება ოპოზიციისა და მისი ლიდერებისადმი საზოგადოებაში უიმედობისა და უნდობლობის გაძლიერებას.

საერთო ნიჰილიზმის ფონზე, რომ არაფერი გამოვა და არაფერი შეიცვლება, ივანიშვილმა შედარებით უფრო ადვილად შეძლოს საზოგადოების აქტიური ნაწილის წინააღმდეგობის დაძლევა, ხოლო შედარებით პასიური ნაწილის მოსყიდვა ან დაშინება.

ოპოზიციის ცალკეული წარმომადგენლების მიერ ამ თვითდაზიანებას მარტივი ახსნა აქვს, მიზანმიმართული მავნებლობა ან პოლიტიკური სიბეცე. მთელ მსოფლიოში მილიონები იხარჯება და კამპანიები იგეგმება იმისთვის, რომ კონკრეტული გუნდი ან პიროვნება წარმოჩინდეს უფრო მიმზიდველი, ეფექტური და ძლერი ვიდრე სინამდვილეშია. ჩვენთან კი, როგორც ჩანს, ჩვენმა კოლეგებმა რაღაც ახალი მოიფიქრეს სუსტები ვართ არაფერი შეგვიძლია და ხმა მოგვეცითო.

დავასრულოთ პოლიტიკური კინკლაობა! საუბრის დროც კი არ დარჩა, ახლა ერთიანი, სწრაფი, აქტიური ქმედებების დროა!“ – აცხადებს პაატა მანჯგალაძე.

კომენტარები